فيديو… 5 تصريحات تاريخية لـ محمد الشناوي مع شوبير.. ”مش هسيب الأهلي”
اطلق محمد الشناوي حارس مرمى النادي الأهلي عددا من التصريحات القوية بشأن العروض المقدمة له وإمكانية رحيله عن القلعة الحمراء.
وفي مداخلة هاتفية مع الإعلامي أحمد شوبير، حرص الشناوي على توضيح بعد الحقائق وكواليس عرض بيراميدز المغري لشراء اللاعب في وقت لاحق.
بدأ الحوار بحديث شوبير، حيث كشف تفاصيل مكالمة جمعته مع الشناوي في وقت سابق وقال شوبير: "اسمحلي اني اكشف عن المكالمة اللي كانت بيني وبينك من خمس شهور ، لما قلتلي انا جايلي عرض مش مصدقه ولا متخيلة ، ولما سألتك انت بتفكر في ايه ، قلتلي النادي الاهلي ، ملقتكش بتناقشني في العرض اللي جالك"
ورد حارس الأهلي: دا حصل وانا ساعتها قلتلك انا تحت امر النادي في اي حاجة ، الناس اللي قريبة مني تعرفني كويس اللي اتربى وعاش في استراحة النادي الاهلي وتاكل مع زمايلك وتروح المدرسة وترجع من المدرسة على الاستراحة وبيبقى معاك مشرف في الاهلي كان مهتم بيك وانت صغير كل الحاجات دي انا شايلها للنادي الاهلي".
وأضاف الشناوي: النادي الاهلي بالنسبالي بيتي ومدرستي ، انا عمري ما هبيع الحاجات دي كلها ، انا بفكر اكون نجم ورقم واحد واروح المنتخب وعلشان تكون كدة مش هتعمله غير في النادي الاهلي.
وواصل حارس المنتخب الأول: اللي اتربوا في استراحة الاهلي عارفين يعني ايه كيان النادي الاهلي ، وزي ما كان وليد سليمان بيقول انا هعتزل في النادي ، احنا كنا بنحلم اننا نعدي من جنب النادي.
وزاد: بالنسبالي لو جالي اي عرض في اي حتة من الخليج او اي حاجة مش هفكر فيها ، مفيش غير مجال الاحتراف اللي لو جيه مش هخرج برضه غير من باب النادي الاهلي غير كدة مش هخرج من الاهلي ، غير كدة انا موجود في الاهلي وهعتزل في الاهلي ودا كلامي ومش هغيره ومش هرجع فيه انا موجود في الاهلي ومش هسيب الاهلي".
وفي سياق متصل اختتم الشناوي تصريحاته: الشناوي : بطولة افريقيا رقم واحد بالنسبالنا وهي ان شاء الله قريبة واحنا مركزين ، واهم شئ تكون الروح موجودة ونكون قريبين من بعض والحمدلله دا حاصل في الفترة الاخيرة ، دور الكباتن كبير ومفيش اي مشاكل لسه موجودة في الاوضة ، دي مشاكل وعادي بتحصل في اي نادي في العالم ، وعندنا الكبير بيحترم الصغير والصغير بيحترم الكبير وكله ماشي على الاسس دي ، والنتيجة لدا كله الحمدلله بتكون واضحة في الملعب".
