عضو مجلس الأهلى يكشف.. خسائر فادحة فى حالة الغاء الدورى
كشف محمد الدماطي، عضو مجلس إدارة النادي الأهلي، عن حجم خسائر الشركات الراعية في حالة إلغاء بطولة الدوري المصري.
وكتب الدماطي عبر صفحته الشخصية على موقع التواصل الاجتماعي "فيس بوك":"حتكلم في البوست دة بصفتي محمد الدماطي مالك احدي الشركات الراعية للدوري المصري الدوري بدا مع خروجة للقنوات الفضائية امثال دريم و مودرن من حوالي ١٣ سنة انة يزيد جدا كقيمة تسويقية و اصبح مع الوقت مغري جدا للشركات المعلنة انها تركز الدعاية علية".
وتابع:" كل دة حصل بشكل متصاعد و زادت الرعاية و حقوق البث لكل الاندية و الاتحاد لحين مذبحة بورسعيد في ٢٠١٢ ، المشكلة مكنتش بس في الغاء الموسم لان دة كان اقل واجب وقتها ، انما المشكلة ان حصل الغاء للموسم اللي بعدة و اتعمل دوري مجموعتين بعدها و دة احدث انهيار في ثقة الشركات المعلنة ان ممكن يبقي في كورة في مصر ، و انهار سعر الرعاية للشركات في الدوري".
وأضاف:"اي راعي لما بيتفق اتفاق طويل المدي بيكون حاطط خطة تسويق انة حيتشاف في الفترة الفلانية ، فمتقدرش كل شوية تقولو لا حلغي. لحد ما جت شركة بريزنتيشن في ٢٠١٤ و خدت ريسك قوي جدا و وضعت استثمار جديد و بدات تبيع للشركات تحت ثقة ان حيبقي في انتظام مستمر بعد كدة، و في اول مطب اللي كان في اول موسم في مذبحة الدفاع الجوي".
وأوضح:" صممت الشركة الراعية علي استكمال الموسم بعد توقف حوالي شهرين للاضرار الاقتصادية اللي ممكن تحصل و قد كان و نجحت التجربة. و من يومها شوفنا كشركات راعية سعر و قيمة الكورة بتزيد موسم ورا التاني و المنظومة كلها استفادت بشكل كبير ، و اصبح الدوري مجال اعلان اساسي لمعظم الشركات بعد ما انطفا بريق برامج التوك شو ، لدرجة وجود اكثر من ١٥ راعي للدوري هذا الموسم علي قنوات اون و دة بقي يودينا للي بيحصل دلوقتي" .
واستكمل:" الغاء الدوري وارد و منطقي و ممكن يعدي تسويقيا بضرر قليل لو هناك ضمان ١٠٠٪ ان اي دوري جديد حيكمل ، و لكن في ظل التاكد من وجود موجة تانية من الكورونا في الشتاء ، و اللّة اعلم ممكن تبقي اقوي من الحالية و يكون هناك اضطرار لالغاء الدوري الجديد ، و هنا حيحصل انهيار لكل القيمة التسويقية للدوري اللي اتبنت بصعوبة علي مدار السنين اللي فاتت، و الشركات المُعلنة اللي من ضمنهم شركتي مش حتقدر تعتمد علي الكورة زي الاول لعدم الاستقرار ، بعد ما كانت وسيلة مريحة لينا للوصول للمستهلك".
وزاد:"دة غير تاثير الكورونا علي ميزانيات الدعاية للشركات اللي لوحدة متوقع يعمل تاثير . الوضع حاليا صعب و الاندية جايز عندها حق انها عايزة توفر بقية عقود لاعبين و المشكلة مع الشركة الراعية مخلياها برة المعادلة شوية غير اللي حصل في ٢٠١٥".
واتم:"لكن الواحد من الامانة لازم يتكلم ان الكل لازم يبص لما هو ابعد ، لان اي الغاء اخر سيعني خسائر و انهيار في حقوق البث و الرعاية باضعاف ما سيتم توفيرة بعدم لعب المتبقي من هذا الدوري.كل الدوريات التي تم استكمالها فكرت بنفس المبدا بعيدا عن الانتماءات او مين حيكسب او يهبط ، احنا وصلنا كلنا كمعلنين و اندية و اتحاد لمعادلة مربحة اتمني الحفاظ عليها".
