شوبير يهاجم رابطة الأندية بسبب مجاملة الأهلي والزمالك
هاجم الإعلامي أحمد شوبير، رابطة الأندية المصرية المحترفة، بسبب مجاملة الأهلي والزمالك على حساب باقي أندية الدوري المصري.
وقال شوبير في تصريحات إذاعية:" حرام اللي بيحصل للاعبي الدوري المصري حاليا، بعيدا عن الأهلي والزمالك، رابطة الأندية عايزة تخلص على اللاعيبة ونرجع تاني لكارثة أحمد رفعت، لاعب مودرن فيوتشر".
وتابع:" فعلا اللي بيحصل في توقيت المباريات دا حرام جدا، إزاي الفرق تلعب الساعة 4 عصرا في الحر دا، وأراهن إن الأهلي والزمالك يلعبوا مباراة واحدة طول الموسم الساعة 4 بالوضع دا، والآخر عايزين أداء ومستويات قوية من اللاعبين".
وأوضح حارس مرمي الأهلي ومنتخب مصر الأسبق:" يا جماعة مينفعش اللي بيحصل دا، رابطة الأندية لازم تراجع نفسها مرة تانية في توقيت المباريات، ودا طلب مش مستحيل، لكن المباريات تتلعب بالتوقيت دا في الحر دا حرام، وأراهن إنكم تطبقوه على الأهلي والزمالك".
وأشار شوبير:" اعتبروا الأندية اللي بتلعب الساعة 4 دي الأهلي والزمالك، عاملين تفرقة ليه بين باقي الفرق والأهلي والزمالك، ولا عشان القطبين عندهم جماهير وإعلام، كل الفرق سواسية ومن حقها تلعب في أجواء طيبة أي كان مصيره بالدوري".
وأتم أحمد شوبير تصريحاته قائلا:" غير مقبول ما يحدث بسبب رابطة الأندية، وهيبقى في كارثة منتظرة بسبب لعب الأندية في الجو الحر دا، وهتحصل كارثة زي اللي حصلت مع أحمد رفعت، وهتفوقوا على كارثة بسبب التعمد في توقيت هذه المباريات، لكن ممكن المباريات بدل ما تتلعب 4 تقام 5 مثلا".
